Сојуз на стопански комори на Македонија


Настани

Угостителските објекти за организирани настани,  очекуваат да започнат со работа

Угостителските објекти за организирани настани, очекуваат да започнат со работа 02.07.2020


Економските оператори од цела Македонија, кои располагаат со големи сали за одржување на прослави обединети во Туристичко угостителската комора при Сојуз на стопански комори на Македонија ги очекуваат одлуките на Комисијата за заразни болести за почеток на нивната работа, кои треба да се донесат на состанокот закажан на почетокот на следната недела. Тие веќе имаат испратено дополнителни предлози на веќе постоечките на Комисијата за заразни болести со почитување на дозволените протокли за работа на угостителските објекти, но се уште повратен одговор нема. „Предлозите се состојат најпрво од изготвување на листа на присутни гости на настанот изготвена од страна на нарачателот на организираната прослава, понатаму дополнување на протоколот  за организирана прослава со  јасно и видливо обележан подиум. Согласно донесените уредби бараме прогласување на трета фаза за редовна работа на угостителските објекти. Безбедносниот аспект ќе биде максимално запазен согласно протоколите за работа и далеку побезбеден од досегашните примери каде што луѓето се само организираат без соодветен безбедносен протокол“, изјави Мартин Ангеловски, потпретседател на ТУК. Компаниите од оваа дејност се адаптираа на новите услови и протоколи за заштита од ширење на пандемијата, сите тие и понатаму ќе се придржуваат на новиот начин на работа, неопходен во услови на моменталната состојба. „Веќе  е донесена Уредба на Владата со одлука за организирање на концерти, отворени гранични премини и останати одлуки кои во себе содржат далеку поголем ризик од организиран настан свадба или прослава. Очекуваме на претстојниот состанок Комисијата за заразни болести да донесе препораки за наше отворање. Состојбата на сите економски оператори  кои директо и индиректно соглано природата на својата дејност се поврзани со угостителските објекти како музички групи, фотографи, компании кои вршат декорација, цвеќарници, златарници, ателјеа за изработка на костуми и венчаници е крајно тешка и неизвесна. Доколку не се донесат препораки за отворање ќе го искористиме нашето демократско право на протест за спас и егзистенција на вршителите на овие дејности и сите вработени“, додаде Ангеловски и  уште еднаш потенцира дека веќе петти месец овие дејности не остваруваат економска активност со што е загрозено нивото постоење и опстанок.
Повеќе ...

Интервју Данела Арсовска: Имаме голема мотивација за уште поактивна поддршка на жените

Интервју Данела Арсовска: Имаме голема мотивација за уште поактивна поддршка на жените 02.07.2020


Претседателот на Сојуз на стопански комори на Македонија, за Женски печат, зборува за предизвиците, достигнувањата, како и за секојдневната работа како прва жена претседател на национална комора во Македонија и една од трите кои се на лидерска позиција во Европа. Во продолжение промотивното интервју за Женски печат. Најголемата независна деловна организација кај нас и водечка деловна мрежа, Сојузот на стопански комори на Македонија, за претседател има жена, Данела Арсовска, која е наша соговорничка во „Женски печат". Оваа успешна жена, која е прва жена претседател на национална комора во Македонија, преку организацијата обединува поголема група жени претприемачи со лидерски капацитет, за кои верува, дека со трансфер на знаење, менторство и соодветна поддршка, ќе се профилираат во идни жени лидери на кои сите ќе бидеме горди. Весна Дамчевска, уредничка во „Слободен печат" прашува: Досега немало жена на чело на национална стопанска комора во Македонија, а чинам ретки се и во светот. Како се чувствувате, условно кажано во машкиот свет? – Како прва жена претседател на национална комора во Македонија и како една од три кои се на лидерска позиција во Европа, предизвик беше да се покаже, дека на функција доминантно раководена од мажи може да биде успешна и жена. Моето мислење, а соодветно на тоа и моите заложби секогаш биле, квалитетот да биде првиот критериум за секоја позиција во општеството, особено за раководните, кои носат со себе голема лична одговорност да се направи нешто што е за општо добро. Сепак, тешко е без воспоставен систем на меритократија базиран на образование, интелигенција и способност, за кој било, а особено за жените да се изборат за позициите што ги заслужуваат. Затоа и вложив многу, мојата позиција да биде показател, дека кога вистинскиот човек, а во овој случај жена, е на вистинското место, успехот е неизбежен. Во континуитет соработката ја темелам врз знаење и аргументи, затоа кој и да стои од спротивната страна, знае да почитува личност водена од тие принципи. Во 2020 година бев избрана на највисоката позиција во раководството на Светската федерација на комори, единствениот глобален форум кој застапува над 12.000 стопански комори од целиот свет. Оваа информацијата одекна глобално со оглед на фактот што само четири жени во светот се носители на таа функција. Како носител на оваа позиција горда сум на изградениот интегритет, кој е признаен и препознаен не само на национално, туку и на интернационално ниво. Од таа функција меѓу лидерите на стопанските комори од САД, Франција, Русија, Велика Британија, делувам да се обезбедат одговори на тековните предизвици, да се подигне свеста, да се промовира етичко однесување, и најважно да се аплицираат сите најдобри светски практики кои можат да придонесат за подобар живот во Македонија. Преку оваа раководна позиција имам директна комуникација со најголемите мултинационални корпорации и брендови на светот, со што се отвораат огромни можности за нас како држава да се позиционираме и да овозможиме бројни инвестиции во Македонија, доколку постои соодветна институционална поддршка за реализација. Весна Дамчевска, уредничка во „Слободен печат" прашува: Дали се случува вие да зборувате со цела професионалност за економијата, а некој во вас да гледа само жена? – Интернационално, но и во Македонија луѓето знаат да ја почитуваат оваа висока позиција и личноста која е нејзин носител. Горда сум што го застапувам приватниот сектор со заложби за подобра национална економија, а Македонија е една од ретките држави во светот која докажа дека жена на типично машка функција како оваа, може да постигне резултати за почит. Бројните интернационални признанија се доказ за успехот, но и моите позиции како експерт во најзначајните меѓународни организации и од оваа година како дел од меѓународната група за подготовка на економските политики и препораки за Самитот на лидери на Влади на Г20. Тешко е да се оспори квалитет, кога Светската трговска организација ќе ве прогласи за шампион за мали бизниси, признание на кое пред нас носител беше единствено Гугл инк. (Google Inc). Верувам дека тоа е додадената вредност на жените лидери, иновативен пристап и поинаква перспектива, на тој начин во традиционалниот деловен свет ќе постигнуваме континуирани успеси и во иднина. Соња Кириџиевска, новинарка во „Слободен печат" прашува: Како успевате да ги балансирате домашните обврски со деловните, кои очекувано се многубројни, со оглед на бројот на членките во Комората? – Семејството ми е најголемата поддршка и постојано ме мотивира да продолжам со заложбите, кои и тие како и јас ги сметаат за своевидна борба за подобрување на условите во кои сите работиме и живееме. Сопругот, синот и моите родители со поддршка го овозможуваат тој баланс меѓу приватното и професионалното и уште поважно придонесуваат во надминување на сите предизвици и постигнување успеси. Во време кога нашата економијата се соочува со бројни предизвици, таа поддршка која ја добивам ми овозможува да можам да се посветам на решенија и мерки кои се значајни за сите нас во приватниот сектор. Значајна поддршка во застапувањето на приоритетните прашања секако добивам и од тимот со кој работам во Сојузот на стопански комори. Затоа активностите за застапување на приватниот сектор кои ги преземаме со тимот на Сојузот, како дел од секојдневните напори здружено да овозможиме подобро деловно опкружување и економски прогрес, даваат успешни резултати. Активно работиме на поддршка на претпријатија во сопственост или управувани од жени, промовирајќи финансиски инструменти за поддршка на жените претприемачи. Ангела Димитровска од Еднакви.мк прашува: Со какви предизвици се соочивте откако дојдовте на позицијата, имајќи предвид дека бизнисот е сè уште машки свет? – Лидерството и успехот не разликуваат пол. Сведоци сме на многу квалитетни примери низ историјата и на денешницата, на силни мажи и жени кои се способни да водат кон успех, но да се добијат еднакви можности за да се постигне тој успех сепак сè уште претставува предизвик. Од сегашна перспектива можам да истакнам единствено позитивни искуства во однос на надминување на предизвиците со кои сум се соочила на позицијата, бидејќи проектите кои ги започнав во својот мандат како претседател, се успешно реализирани и уште поважно препознаени на меѓународно ниво, за што имаме признанија од Светската трговска организација, Светската царинска организација, но и многу други. Успеавме со квалитетни проекти да ја издвоиме Македонија како пионер во иновативни решенија во својата област на работа, тоа се успеси кои можеме да се пофалиме дека се постигнати со тим што е воден од жена. Тешко е без воспоставен систем на меритократија базиран на образование, интелигенција и способност, за секого, а особено за жените, да се изборат за позициите што ги заслужуваат. Ангела Димитровска од Еднакви.мк прашува: Што имате досега направено за поттикнување на женското претприемништво во земјава и интернационално? – Заложбите на Сојузот на стопански комори континуирано се насочени кон поттик и поддршка на претприемништвото, базирано на знаење и иновации со цел постигнување поголем економски раст, а женското претприемништво е сегмент на кој сме особено посветени, бидејќи веруваме дека во него се крие најголемиот потенцијал. Се залагаме за дерегулација, преку отстранување на административните бариери и даночно ослободување во првите години од започнувањето со дејност, претприемачите да имаат можност да постигнат стабилност и раст. Активно работиме на поддршка на претпријатија во сопственост или управувани од жени, промовирајќи финансиски инструменти за поддршка на жените претприемачи и овозможувајќи програми за градењето на нивните капацитети. Со поддршка на женското претприемништво се залагаме за економско јакнење на жените преку овозможување на нивна поголема финансиска независност. Затоа имаме важна улога во унапредување на позициите на жените и нивно градење како идни лидери во индустријата во која работат. Секоја година се вклучуваме во активна кампања за да постигнеме родов паритет на платите и да го срушиме стаклениот плафон со затворање на родовиот јаз во тој поглед. Како одраз на признание на заложбите за поддршка на женското претприемништво од декември минатата година сум член на раководството на Глобалниот комитет на жени лидери, составен од 12 светски познати жени на високи раководни функции, а претседаван од Свати Мендела, внуката на Нелсон Мендела. Комитетот соработува со претседатели на држави и влади на глобално ниво и ја адресира заложбата за изедначување на третманот на жените. Со македонски претставник во Глобалниот комитет, докажавме дека малите земји, кои се во развој, не се незначајни во глобалните текови. Успеавме со професионални постигнувања, кои никој не може да ги оспори, да се позиционираме и пред претставници на големите и силни економии, кои имаат поголема финансиска и политичка поддршка. Тоа е мотив за новите генерации, да стекнат свест и храброст да придонесат за глобални промени и целиот свет тоа да го препознае. Успеавме со квалитетни проекти да ја издвоиме Македонија како пионер во иновативни решенија во својата област на работа. Наташа Мерсовка, уредничка на економска редакција на телевизија Сител прашува: Со оглед на тоа дека помалку од три отсто од жените се на раководни позиции, а според податоците, се трипати помалку платени, колку е тешко да се биде жена на лидерска позиција? – Процентот на жени на високи позиции во приватниот сектор во Македонија е далеку од европскиот просек. Со само два отсто жени на високи раководни функции во приватниот сектор сме далеку од просекот на економски и демократски развиените земји, но затоа и мотивацијата е голема да се вклучиме уште поактивно во поддршката на жените кои се борат за лидерски позиции. Ништо не е лесно во времето во кое живееме, така и жените на лидерски позиции се борат со бројни предизвици, кои успешно се совладуваат доколку вистинскиот човек е позициониран на вистинското место. Верувам дека неопходно е да се продолжи со меѓусебна поддршка и стимулирање што повеќе квалитетни женски примери да добиваат можност да покажат резултати. Во нашата организација обединуваме поголема група жени претприемачи со лидерски капацитет, кои верувам дека со трансфер на знаење, менторство и соодветна поддршка, ќе се профилираат во идни жени лидери на кои сите ќе бидеме горди. Каква е вредноста на женското мислење и на женскиот став во деловниот свет? Како реагира спротивниот пол, на еден женски, сигурен и аргументиран став? – Мудар човек низ секојдневната комуникација секогаш се обидува да научи и да стекне знаење низ искуствата на другите. Така и реагираат сите кои се свесни и паметни, на аргументиран став кога доаѓа од некој со доволно познавање за економските текови и кој со интегритет застапува над 24 илјади македонски претпријатија.
Повеќе ...

Игротеките бараат поддршка и протоколи за почеток со работа

Игротеките бараат поддршка и протоколи за почеток со работа 01.07.2020


Три конкретни мерки за што поскоро отворање и почеток со работа предложи Групацијата на забавни, рекреативни и едукативни дејности и игротеки при Сојуз на стопански комори на Македонија на денешната прес конференција. Трајко Николовски, претседател на Групацијата, истакна дека бројот на неработни денови е трицифрен и веќе влегуваат во петтиот месец на кризата која почна во март, не со процентуално намален промет, туку со промет нула, бидејќи се уште воопшто не ја остваруваат дејноста . „Како мали бизниси за да отпочнеме со дејност, многумина од нас, освен сопствени имаат вложено и позајмени средства како од роднини и пријатели, така и од комерцијалните банки, при тоа заложувајќи ги под хипотека и своите живеалишта. Состојбата во која се наоѓаме е алармантна, резерви на средства немаме.  Сакаме да истакнеме дека иако игротеките од 11 март престанаа со вршење на својата дејност, прославувањето на детските родендени не престана. Родендените продолжуваат да се организираат во домашни услови, без соодветни протоколи. Изминативе денови до Комисијата за заразни болести ги предадовме и предлог протоколите кои самите ги изработивме, следејќи и прифаќајки ги позитивните примери на земјите од соседството, кои сме подготвени да ги почитуваме во целина.  Сите предлози и дополнувања од Комисијата за заразни болести се добредојдени“, изјави Николовски и додаде дека како економски оператори родендените кои ги организираат се исклучиво од затворен тип, т.е. со ограничен број на гости кои добро му се познати на организаторот на роденденот, како и нивната здравствена состојба, бидејќи станува збор за гости од исто семејство, блиски роднини и пријатели. Компаниите од секторот најпрво бараат финансиска поддршка во висина на половина од просечниот месечен бруто приход земен од времето кога работеа, секој месец без прекин на неодредено време до нивно повторно отворање, како би можеле да ги сервисираат закупнините, режиските трошоци, платите и придонесите во периодот кој им претстои затоа што моментално не работат, имаат промет нула и се уште се затворени. „ Понатаму, Комисијата за заразни болести да даде препорака да ги отвориме објектите по примерот на земјите од соседството, кои што повеќе од еден месец беспрекорно работат, затоа што животот продолжува со почитување на протоколите за заштита на здравјето.  И трето во време кога секој од нас е важен, кога се бориме за секое работно место, кога сите сакаме нови инвестиции, нови вработувања, јавно прашуваме, што ќе се случи со нашите инвестиции во кои работат повеќе од илјада луѓе и егзистираат исто толку семејства. Бараме одговор, дали треба да дозволиме овие 1000 семејства да останат без егзистенција, да останат без работните места кои сами ги створиле и да изгубат се што вложиле“, изјави Николовски. Компаниите кои се занимаваат со овие дејности, од сите градови во земјата, се здружени и единствени, но само со заедничка работа на сите чинители може да се надминат предизвиците и економски да опстојат.
Повеќе ...

Прегледај ги сите Новости

Идни настани

ЕКСПО 2020 ДУБАИ  ќе започне на 1 октомври 2021 година

ЕКСПО 2020 ДУБАИ ќе започне на 1 октомври 2021 година 01.04.2020


Престижната саемска манифестација ЕКСПО 2020 ДУБАИ која требаше да почне на 20 октомври 2020 гoдина, а беше одложена поради пандемијата, ќе се одржи од 1 октомври 2021 година до 31 март 2022 година. Организаторот на настанот информира дека ЕКСПО 2020 ДУБАИ го задржува своето име и останува посветена на тоа да биде домаќин на исклучителен настан каде ќе се промовира креативноста, културата и иновациите на човештвото - вклучувајќи ги и големите технолошки достигнувања во областа на медицината и науката. Владата на РСМ која организира бесплатно преставување на домашните компании на оваа манифестација во наредниот период ќе информираат за новите активности за организација на настанот. На овој линк може да ја погледнете информацијата за новите датуми за одржување на настанот која ја објавува организаторот.
Повеќе ...

Покана за економскиот саем „China International Import Expo 2020“ во Шангај

Покана за економскиот саем „China International Import Expo 2020“ во Шангај 03.03.2020


Сојузот на стопански комори на Македонија во соработка со Амбасадата на НР Кина во Македонија, Ве информира за можноста за Ваше учество на првиот национален светски економски саем „China International Import Expo 2020“ CIIE  кој ќе се одржи од 5 до 10 ноември 2020 во Шангај. На највисоко ниво,  Владата на НР Кина трета година по ред, ќе им посака добредојде на владини делегации, деловни заедници и компании од целиот свет, за да ги разгледаат можностите кои ги нуди големиот кинески пазар, со особен акцент на зајакнување на трговијата и економската соработка. Саемот е во организација на Министерството за трговија на НР Кина и општината на Шангај во соработка со Светската трговска организација и Организација на обединети нации.   Владата на НР Кина дава целосна поддршка на саемот со посебен акцент на извозот, за либерализација на трговијата и економска глобализација за отворање на кинескиот пазар кон светот со цел зајакнување на интернационалната трговија.   Минатата година во присуство на бројни делегати, претседатели на држави, премиери, министри од целиот свет, саемот го отвори претседателот на НР Кина, Си Џинпинг.  Присуствиваат повеќе од 3800 изложувачи од 181 земји, регионo  и интернационалнo.   Доколку имате интерес за регистрација Ве молиме да не известите на меил: info@chamber.mk или на тел. 02 30 91 440, контакт лице: Марија Мустрик.   Крајниот рок за пријавување е  30 април 2020, а повеќе информации за саемот и за регистрација може да најдете на следниот линк.
Повеќе ...

Календар на саемски манифестации во Босна и Херцеговина за 2020 година

Календар на саемски манифестации во Босна и Херцеговина за 2020 година 23.01.2020


Сојуз на стопански комори на Македонија во соработка со Министерство на надворешни работи Ве информира за можноста за учество на саеми во Босна и Херцеговина кои ќе се одржат во 2020 година. Целосниот календар на саемски манифестации можете да го погледнете на следниот ЛИНК. За сите дополнителни информации, Ве молиме контактирајте не на телефон 02 3091 440 или на е-маил: info@chamber.mk. Со почит, Сојуз на стопански комори на Македонија
Повеќе ...

Прегледај ги сите настани

Сојуз на стопански комори на Македонија

Сојузот на стопански комори на Македонија (ССК) како унија од 33 стопански комори организации и здруженија, е најголемата независна деловна организација во Република Македонија која ги промовира и застапува интересите на компаниите и ги поврзува со над 1000 национални, регионални и интернационални институции и организации. Со својата комплексна организација Сојузот е најголем претставник на бизнис заедницата кој е во чекор со модерните достигнувања во деловниот свет и континуирано активно придонесува во развојот на компаниите и националната економија.


Повеќе од 23.000 компании организирани во Сојузот на стопански комори на Македонија, кои се успешни во својата дејност, со конструктивни предлози, придонесуваат за подобрување на бизнис амбиентот во земјата.

 

Сојузот овозможува пристап до информации, бази на податоци, едукација за претприемништво, правни совети,  помага во пронаоѓањето на деловни партнери,  известува за домашни и меѓународни тендери,овозможува настапи на саеми, обезбедува информации за извори на финансирање. Делувајќи во рамки на секторските комори, компаниите влијаат на промена на регулативата, а коморските контакти се поддршка во контактите со државните институции, како и добра препорака во активностите за јавни набавки, во Република Македонија или интернационално.


ССК ги познава условите за соработка и бизнис насите странски пазари и вмрежена е со економски асоцијации и институции ширум светот.

 

На Вашиот пат кон успехот ќе се соочите со многу предизвици затоа што тоа е составен дел на деловното работење. Во сите овие ситуации, не двоумете се да ни се обратите,преку Вашата секторска комора или координатор.


Сојуз на стопански Комори на Македонија е Ваш партнер во бизнисот и вработените на Комората се достапни за сите потребни бизнис информации и услуги.

Сојуз на стопански комори на Македонија е институција која ги застапува интересите на сите стопански субјекти членови на комората.


Покрај големите компании, а имајќи го предвид фактот дека малите и средни претпријатија се движечка сила на секоја економија и дека нивниот развој, долгорочно гледано, води кон јакнење на целокупната економија, разбирливи се заложбите на ССК за развој и поддршка на малите и средни претпријатија.  Развојот на малите и средни претпријатија и на претприемништвото доби своја афирмација во македонското стопанство не само како средство за негување и унапредување на претприемнички дух, туку и за поттикнување на свеста во насока на конзистентната потреба од промени и реформи на економската сцена, како еден од главните приоритети на ССК.

 

 


Сподели