ССК од Владата побара итно нов сет мерки за спас на економијата

ССК од Владата побара итно нов сет мерки за спас на економијата 02.09.2020

Сојузот на стопански комори на Македонија на денешната официјална средба со претседателот на Владата и економскиот тим, ги потенцираше приоритетите кои треба да отпочнат да се реализираат уште во првиот месец од формирањето на новата Влада, за справување со кризата, а потоа за економско закрепнување. Данела Арсовска, претседател на Сојузот на средбата со премиерот Зоран Заев  истакна дека најпрво е потребна директна финансиска помош за претпријатијата кои се во тешка состојба и се борат да ја одржат ликвидноста.  „Директна таргетирана финансиска помош во следните месеци е неопходна за опстојување и покривање на основните месечни трошоци, а воедно да се овозможи на оние на кои им е тоа неопходно одложување или репрограмирање на кредитите, аконтациите за даноци и другите  финансиски оптоварувања минимум до крајот на годината. Најавата за  укинување на парафискалните односно скриени давачки кои во вкупната сума често ги надминуваат даночните обврски, беше едно од нашите барања и очекуваме согласно ветеното реализација на ова ветување. Овие скриени и непредвидени трошоци кои согласно регистарот на ССК ги има повеќе од 145 се очекува да се скратат, со што во време на криза ќе биде дополнителна помош за претпријатијата.  Важно е и справувањето со сивата економија со одлучна акција уште во првите месеци од новата Влада. Ако не се реши во криза овој проблем, неиздржливоста на состојбите ќе поттикне даночна евазија. Доколку оние кои работат на црно нерегистрирани поминуваат неказнети, тоа ќе испрати лоши сигнали за сите граѓани кои се дисциплинирани и плаќаат даноци.  Дополнително, посебен акцент треба да се стави на коалициската борба со корупцијата за да нема можност за изигрување на прописите“, изјави Арсовска и додаде дека на приватниот сектор му е потребно владеење на правото, сигурност  и верба во институциите. Претседателот на Владата, Зоран Заев рече дека Сојузот на стопански комори е значаен и испрати порака до малите и средни претпријатија  дека државата е тука кога треба да се подаде рака и да биде најдобар сервис на граѓаните.   Дополнително тој најави капитални инвестиции, стабилна даночна политика, дигитализација, реформа во администрацијата, намалување на парафискалните давачки за 70%, поддршка на извозот, владеење на правото. Заев потврди дека Сојузот ќе биде вклучен во креирањето на економските политики и во следењето на нивната имплементација, единствено така може да очекуваме зголемен економски раст и развој. Премиерот истакна дека од Сојузот очекува голема помош во борбата со сивата економија, која ќе се спроведува во најголем дел преку зајакнување на инспекциските служби како и со дополнителни инструменти. Претседателството на Сојузот на стопански комори на Македонија во разговорите со економскиот тим на Владата ја истакна важноста  неопходните економски приоритети да бидат во согласност со реалните потреби на претпријатијата.   Сојузот на стопански комори како највисока форма на организирање на национално ниво е најголемата деловна мрежа која застапува преку 35 стопански комори и организации.  
Повеќе ...

Субјектите со месеци принудно затворени со Уредба бараат итно донесување протоколи и финансиска поддршка за опстанок

Субјектите со месеци принудно затворени со Уредба бараат итно донесување протоколи и финансиска поддршка за опстанок 25.08.2020

Пред пропаѓање во исклучително тешка состојба се претпријатијата од секторот услуги кои како резултат на владината Уредба се уште се принудно затворени и не се во можност да ја остваруваат својата дејност. Дополнително нивната неизвесност е голема со оглед на тоа што за нив воопшто не се донесени протоколи за почеток со работа, за разлика од целиот свет каде за сите дејности има утврдени правила за вршење на дејност. Овие сектори се принудно затворени немаат никакви приходи и иако се уште им се генерираат трошоци за плати, наемнини и режиски трошоци за нив веќе со месеци нема никаква финансиска поддршка. Станува збор за над 1000 субјекти со дејност игротеки, приватни установи за едукација и грижа на деца, објекти за организирани настани како свадби, родендени, крштевки, како и други семејни веселби, кои веќе шести месец не остваруваат никаков приход и финансиски не можат да опстојат во кризата. Претпријатијата од овие дејности бараат итно протоколи за почеток со работа или доколку се одлучи принудно да останат затворени, да се донесат мерки за финансиска поддршка со кои ќе ја преживеат кризата. Ликвидноста е целосно нарушена, а  со самото тоа и можноста да ги задржат вработените, да ги сервисираат обврските и основните месечни трошоци. Во континуитет доставувани се писмени барања со издржани предлози до надлежните институции, како и протоколи за работа согласно оние од земјите во регионот и пошироко, каде на овие дејности уште пред неколку месеци им е овозможено да работат. Доколку се утврди дека нема можност за извршување на дејноста, економските оператори бараат да се донесе економски пакет од шест мерки за финансиска помош за опстанок. Субвенции за плати за сите досегашни и идни месеци додека се принудно затворени  од институциите, во износ на минималната бруто плата Одложување од обврските за плаќање кон претпријатијата кои вршат комунални дејности до крајот на годината  Ослободување од обврските за аконтативно односно однапред плаќање на данок на добивка и персонален данок на доход Ослободување од плаќање на данок на имот спрема општините и Градот Скопје за месеците за кои принудно не вршат дејност Мораториум со репрограм за кредитните обврски спрема банките до крајот на годината Еднократна  парична  помош  за  сите  објекти врз основа на претходно определени критериуми и параметри засновани на годишни приходи и платените даноци во изминатите години. Со формирање на новата Влада, претпријатијата од овие дејности очекуваат во најкраток можен рок да се реши моменталната состојба, во спротивно својот револт ќе го истакнат на протест. Да се затворат принудно со месеци без услови со кои ќе можат да ја преживеат кризата е нечовечки и помош или деблокада се единствениот излез. 
Повеќе ...

За дел од угостителите уште нема протоколи, Комисијата итно да ги донесе за да се превенира хаос

За дел од угостителите уште нема протоколи, Комисијата итно да ги донесе за да се превенира хаос 30.07.2020

Туристичко угостителската комора при Сојузот на стопански комори на Македонија, денес одржа состанок со Комисијата за заразни болести на која угостителите повторно, ја искажаа неопходноста од креирање и донесување соодветни протоколи кои би се почитувале за контролирано одржување на прослави и настани во угостителските објекти.  Континуирано на состаноците на ТУК со Комисијата за заразни болести, се укажува дека дел од капацитетите во оваа дејност веќе половина година воопшто не работат, поради неизготвување на протоколи, со што се става под знак прашање егзистенцијата на нивните вработени.  „Туристичко угостителската комора уште на почеток на месец јули, изготви предлог протоколи за работа според кои се предвидува работа во контролирани услови и иако во Комисијата беа оценети како прифатливи, се уште не се донесени. Безбедносниот аспект мора да биде максимално запазен согласно протоколите за работа. Во спротивно како и досега  ќе се соочуваме со приватно во сопствена режија организирање на прослави без соодветни безбедносни протоколи. Во исто време за разлика од семејните прослави, дозволени се концерти и други настани со далеку поголем број учесници за кои има предвидени протоколи.  Очекуваме Комисијата за заразни болести да донесе препораки за отворање, затоа што состојбите поради недостатокот на протоколи може да излезе вон контрола. Состојбата на сите економски оператори кои директно и индиректно согласно природата на својата дејност се поврзани со угостителските објекти како музичките уметници, фотографи, претпријатија за декорација, накит и голем број други, е крајно тешка и неизвесна“, изјави Мартин Ангеловски, потпретседател на Туристичко-угостителската комора и додаде дека доколку наскоро не се започне со работа овие субјекти нема да издржат да опстојат на пазарот. Претпријатијата од оваа дејност се адаптираа на новите услови, сите тие се придржуваат на новиот начин на работа, неопходен во услови на моменталната состојба. Во исто време и доколку како и во останатите дејности се донесат протоколи за заштита од ширење на пандемијата, истите ќе се почитуваат во целост и ќе се превенира неконтролирано организирање прослави во домашни услови и приватна режија.  
Повеќе ...

Сметководителите со општествена одговорност инвестицираат за подобро утре

Сметководителите со општествена одговорност инвестицираат за подобро утре 23.07.2020

Комората на сметководители на Македонија, при Сојуз на стопански комори продолжува со организираните акции за практикување на општествена одговорност во услови на пандемија. Со симболичен гест, денес Комората на сметководители во знак на официјален почеток на долгорочна соработка, донираше за ресторанот „Амбрела“, кој од самото отворање креира успешна приказна рушејќи ги бариерите и поместувајќи ги границите во нашето општество вработувајќи лица со попреченост. „Општествената одговорност не треба да се гледа како трошок, туку како инвестиција за подобро утре и првенствено значи да ги извршуваме нашите задачи најдобро што умееме. Тоа е нашата примарна одговорност кон општеството и тоа е најдобрата основа на која ги надоградуваме сите останати активности преку кои се обидуваме да го подобриме квалитетот на животот во средината во која работиме. Силно веруваме дека ние треба да сме промената која што сакаме да ја видиме во светот, давајќи примери преку креирање акции кои ја надминуваат сферата на нашата работа и ја истакнуваат нашата свест за општествена одговорност, посебно во услови на моменталната криза која ја живееме“, изјави Драган Митковски, претседател на Комората на сметководители и додаде дека заедно со ресторанот „Амбрела“, првиот кој вработува лица со попреченост во иднина, кога условите ќе дозволуваат ќе ја продлабочува соработката и поддршката. Менаџментот на ресторанот „Амбрела“ истакнувајќи ја благодарноста за соработката со деловната заедница, потенцира дека општествена одговорност во земјава се практикува и дека секоја акција и внимание во услови на пандемија е од голема значење за непречено работење на компаниите. „Ресторанот Амбрела се адаптира на новите услови на работа и продолжува со силните заложби за подигнување на свеста за општествената одговорност на институциите и приватниот сектор во земјата за децата со посебни потреби“, изјави Гоце Ивановски, менаџер. Од почетокот на пандемијата, Комората на сметководители на Македонија при Сојузот на стопански комори, континуирано делува за поддршка и помош на оние кои во услови на здравствено економска криза им е најпотребна. За Институтот по белодробни заболувања кај децата Козле, Сојузот, обезбеди тунел за дезинфекција и дополнителни средства за заштита како и  дигитален пулт за бесконтактно мерење на температура и за дезинфекција, што е особено важно бидејќи се работи за деца со респираторни проблеми и белодробни заболувања и нивната заштита од вирусот е од исклучително значење. Дополнително организираа бројни кампањи и акции за обезбедување опрема за ранливите категории, а се ставија на располагање на државните институции за про боно помош особено за анализа на флуктуациите во економијата и изготвување на акциски план. Комората на сметководители ги поканува сите свои членови, соработници и пријатели да го посетат Амбрела и да придонесат за рушење на бариерите и границите во нашето општество.
Повеќе ...

Информација за објавен Јавен повик за отворање на нови работни места

Информација за објавен Јавен повик за отворање на нови работни места 23.07.2020

Во насока на континуирано проследување на нови информации кое се однесуваат на стопанството, Сојузот на стопански комори на Македонија во соработка со Агенцијата за вработување на РСМ Ве информира дека е објавува Јавен повик за отворање на нови работни места преку користење кредитни средства. Пренесуваме краток преглед на јавниот оглас: Намена: Јавниот оглас е наменет за отворање на нови работни места во правни субјекти (микро, мали и средни претпријатија) кои сакаат да го прошират и развијат сопствениот бизнис преку користење на кредитни средства Услови: Пријава за учество во овој Проект може да достави правен субјект (микро,  мало и средно  претпријатие) кој: е регистриран најмалку 6 месеци има изготвено годишна сметка за претходната година, има најмалку 1 вработено лице на денот на аплицирањето и не го намалил бројот на вработените лица во последните 3 месеци пред денот на аплицирањето. Правните субјекти може да добијат кредит во износ од 5.000 евра за секое новоотворено работно место. Правниот субјект кој ќе вработи невработено лице со полно работно време, има обврска да го задржи на работа најмалку 3 (три) години од денот на засновање на работниот однос. Условите под кои може да се добијат кредитните средства се следните: Рок на враќање на средствата е 4 години со вклучен грејс период од 1 година, Каматна стапка од 1% на годишно ниво, Гаранција за поврат на средствата со хипотека во однос 1:1 со одобрениот кредит или сопствена меница авалирана од најмалку еден авалист.на кредитни средства. Јавниот оглас е отворен со 14.08.2020 година, а во целина може да се види на следниот линк. За повеќе информации контактирајте не на info@chamber.mk или на тел. број 02-3091440.
Повеќе ...