ТУК, ХОТАМ и НАИТАМ потпишаа Меморандум за соработка

ТУК, ХОТАМ и НАИТАМ потпишаа Меморандум за соработка 22.10.2019

Туристичко – угостителската комора (ТУК), Здружението ХОТАМ и Националната Асоцијација за дојдовен туризам (НАИТАМ) потпишаа Меморандум за соработка за заедничко делување во насока на подобрување на состојбата со секторот туризам и угостителство со цел понуда на квалитетни решенија кои треба да придонесат за развој на оваа важна стопанска гранка. Претседателот на ТУК, Владимир Граматиков заедно со претседателот на НАИТАМ, Влатко Сулев и Асим Меџедовиќ, кординатор за агенции на ХОТАМ на средбата со министерот за економија г. Крешник Бектеши, дискутираа за можностите за подобрување на деловната климата на компаниите во секторот.
Повеќе ...

Нова волонтерска еко-акција на Пивара Скопје

Нова волонтерска еко-акција на Пивара Скопје 18.10.2019

Во најновата еко-акција, што се спроведе во рамки на повеќегодишната платформа „Рециклирате ли!?“, волонтерите на Пивара Скопје исчистија неколку километри од кејот на реката Вардар во скопските општини Аеродром и Гази Баба. При тоа беше собран целиот сув отпад од патеките и бреговите на двете страни на реката, кој понатаму ќе биде соодветно селектиран и рециклиран. Како и на претходните, така и во оваа волонтерска еко-акција на Пивара Скопје активно се вклучија амбасадорите на Холандија, Велика Британија и САД, со членови на персоналот на амбасадите, а овој пат засилување пристигна и од волонтерите од СОС Детско село и Стопанската комора на северозападна Македонија. Акцијата ја поздрави и градоначалникот на Гази Баба. Традиционално, целокупната логистичка поддршка при транспортот, селектирањето и рециклирањето на собраниот отпад во акцијата ја даде Пакомак. За вадењето на отпадот од реката се погрижија нуркачите од спелеолошкото друштво „Врело“. „Пивара Скопје посветено работи на остварување на поставените цели и своите заложби за ‘Свет без отпад’. Оваа еко-акција, како и претходните, покажуваат дека како компанија, но и како поединци, сме подготвени да одвоиме средства и дел од своето своето работно време, за да придонесеме во остварување на тие заложби. Ме радува што со секоја нова волонтерска акција бројот на нашите партнери кои ги делат истите вредности и кои нѐ поддржуваат во оваа наша мисија, постојано се зголемува“, изјави генералниот директор на Пивара Скопје, Дан Тимотин. „Со ваквите волонтерски активности кои ги организираме заедно со нашите партнери, сакаме да упатиме јасна порака и апел до целата заедница дека сите треба да го преземат својот дел од одговорноста и повеќе да се ангажираат во решавањето на проблемот со загадувањето, со што ќе создадеме одржлива иднина за нас и за идните генерации“, потенцираше Тимотин. Платформата „Рециклирате ли!?“, наменета за подигнување на јавната свест за потребата од собирање и рециклирање на отпадот, започна да се реализира во 2016-та година, со организација на првата еко-акција за чистење на кејот на реката Вардар, а продолжи и во наредните две години, со втората еко-акција за чистење на кејот и водите на Вардар, како и чистење на околината и водите на езерото Матка. Во овие акции беа собрани вкупно над 30m³ отпад, за што беа вложени над 300 часови волонтерска работа. Минатата година беше организирана и волонтерска активност за подигнување на јавната свест за замена на неразградливите пластични кеси со алтернативни решенија кои не ја загадуваат животната средина, а беше спроведен и едукативен караван со кој беа опфатени над 10.000 основци. За извршниот директор на Пакомак, специјализирана компанија за управување со отпад од пакување која е партнер на Пивара Скопје во сите вакви акции, одговорноста и обврските за решавање на предизвиците поврзани со заштитата на животната средина треба да бидат рамномерно распределени на сите засегнати субјекти во општеството. „Уште од нашето основање, па сѐ до денеска, благодарение на финансиите и поддршката од нашите основачи, како Пивара Скопје и другите наши членови, успешно ги исполнуваме и ги надминуваме еколошките цели и таргети за собирање и правилен третман на отпадот од пакување што ги одредува државата. Но, постојат компании и субјекти кои пласираат различна амбалажа на пазарот и генерираат отпад, а не учествуваат во финансирањето на системите за негово собирање и рециклирање, ниту ѝ плаќаат на државата за тоа, со што директно го оштетуваат буџетот и животната средина. Ова е проблем кој мора соодветно да се адресира и да се решава“, изјави Ико Брдароски, менаџер за грижа на корисници во Пакомак. Следејќи го глобалното лидерство на групацијата Coca-Cola HBC во доменот на одржливиот развој, како и практиките за одржливост на HEINEKEN, Пивара Скопје континуирано вложува и спроведува практики кои придонесуваат за почиста животна средина, како што е употребата на амбалажа која целосно може да се рециклира, примена на мерки за заштеда на вода и енергија, како и за намалување на сите емисии од прозводството, вклучувајќи го и соодветниот третман и ре-употреба на водата што се користи во производствениот процес. Како еден од основачите на Пакомак, Пивара Скопје постојано вложува и во ефикасноста на системот за собирање и рециклирање на целокупниот отпад од пакување во земјата. За предводничката улога во доменот на одржливиот развој и евидентните резултати во заштита на животната средина, Пивара Скопје има добиено голем број домашни и меѓународни признанија меѓу кои и годинешната награда „Предводници на Целите за одржлив развој“ на Обединетите Нации, што се доделува во рамки на Проектот „Градење меѓусекторски партнерства за одржлив развој“, кој е финансиран од Европската Унија, а го спроведува граѓанската организацијата „Конект“.
Повеќе ...

Арсовска: Не ни треба

Арсовска: Не ни треба "мал шенген" со Србија и Албанија, туку реформи за влез во ЕУ 08.10.2019

Иницијативата на претседателот на Србија, Александар Вучиќ, за создавање на таканаречен „мал Шенген“ меѓу Албанија, Македонија и Србија, како земји во регионот кои се многу мали за да влијаат врз економските показатели во Европа е тема која е актуелна изминатава недела. Српскиот претседател пред неколку дена, најави дека премиерите на Македонија и на Албанија, на 9 и 10 октомври  во Србија ќе присуствуваат на состанок посветен на отстранување на царинските бариери или како што е истакнато, со нив ја иницирал идејата за понатамошно отстранување на различните бариери за водење бизнис на територијата на трите држави и слободниот проток на стоки, луѓе и услуги, односно создавање на еден вид „мал шенген“. Под изговор дека економското здружување е важно и дека ова е чист економски интерес за нашите земји да ги отстранат царинските и трговските бариери, се заговара нова изолација во микро регион каде Белград ќе ги води Скопје и Тирана во економски поход.  За Србија имаме одлична геостратешка позиција и важно е Србија да има пристап до Грција и албанските пристаништа. Но што ќе има Македонија од овој концепт, освен пристап до затворен систем од 3 држави кои наместо да се интегрираат во ЕУ, ќе бидат убедувани дека одлично е и ова решение. Кога на исток и југ граничиме со земји на ЕУ логично би било приоритет да ни е зголемување на таа соработка и интеграција кон единствениот економски пазар на ЕУ. Во време кога сме условно пред вратите на НАТО и со можности за отпочнување преговори со Европската Унија, чудна е идејата да влеземе во економска дива градба "мал шенген" со Србија која има различни определби од македонските во надворешната политика, особено во пристапување кон северноатланската  алијанса, додека македонските ЕУ и НАТО определби, се повеќе од јасни. Од друга страна Албанија во сите извештаи на ЕУ е чекор зад Македонија во напредокот и оваа насока на превземање чекори за заедничко економско делување не би придонело значително за наш побрз развој. Како да не ни беше доволно тоа што сме сегрегирани во гетото Западен Балкан, сега во уште помал формат ќе се изолираме во „мал шенген“, со некаква илузија дека така економски ќе процветаме. По ретрограден став од овој одамна не е понуден, мал шенген за Србија, Македонија и Албанија е идеја која треба да згасне уште пред да се роди. Зошто би правеле вакви микро економски сојузи кога целта треба да ни е да ги спроведеме структурните економски реформи потребни да станеме дел од единствениот економски пазар на Европската Унија, а не вечно да чекаме пред вратите на ЕУ како диво месо отцепено од интеграциите со утеха на тоа дека сме дел од некаков "мал шенген". Не, благодариме.
Повеќе ...

Арсовска на Економист: Западен Балкан е слепото црево на Европа, неопходна е ЕУ интеграција

Арсовска на Економист: Западен Балкан е слепото црево на Европа, неопходна е ЕУ интеграција 01.10.2019

На панел сесијата посветена на економијата во рамки на Самитот на лондонски Економист, претседателот на Сојузот на стопански комори (ССК), Данела Арсовска, заедно со директорот на канцеларијата на Светска Банка во Македонија, Марко Мантованели и претседателот на Федерацијата на индустрии на Грција (СББЕ), Атанасисо Савакис, дискутираа за можноста Западен Балкан да се развива како бизнис хаб, со особен акцент на привлекување на инвестиции во регионот, инфраструктурана поврзаност, како и можноста за економски раст преку иновации. Давајќи одговори на трите теми Арсовска истакна дека погрешен е пристапот државите од регионот, вклучувајќи ја и Македонија да се гетоизираат во Западен Балкан. „Западен Балкан како гето не носи повеќе можности за успех, ниту за државите поединечно, ниту како регион и овој пристап не даде резултати. За да се овозможи развој потребно е Македонија, што поскоро да се интегрира во Европската Унија, а не да биде дел од Западен Балкан, како слепо црево на Европа. Тоа е единствениот начин за да ни се овозможи подеднакво да учествуваме на единствениот економски пазар, но и да пристапиме и да се отвориме кон и за глобалните пазари. Датумот за интеграција треба да е транспарентен и извесен,  како и безрезервната поддршка во имплементирање на структурните економски реформи. Она кое што е предизвик за сите држави од Западен Балкан е што сите меѓусебно се конкуренти и покрај тоа што традиционално се најдобри партнери во трговската размена заедно со Западно Европските земји. Вториот заеднички предизвик за економски развој на регионот е владеењето на правото, поточно, најголемиот јаз  согласно индикаторите на Светска Банка помеѓу земјите од ЕУ и  Западен Балкан  е владеењето на правото,  борба против криминалот и корупцијата“, изјави Арсовска. Таа додаде дека со отстранување на бариерите кои го отежнуваат растот на компаниите во земјите од регионот, ќе се создаде можност преку поттикнување на претприемништво и иновации, да се создадат нови работни места и да се искористи потенцијалот на човечки капитал кој е клучен за постигнување на економски раст. Арсовска посочи дека инфраструктурните проекти се долгорочни ивестиции кои ќе го поврзат регионот со светот, при што условите за напредок преку заеднички регионален пазар од над 20 милиони ќе го направат регионот поконкурентен, но и секоја од државите поединечно, со оглед на тоа што засебно сме мали пазари, а преку хармонизирање на инвестициските политики ќе им се овозможи на странските вложувачи да работат послободно во регионот. На еднодневниот самит на заесебни панел сесии дебатираа и премиерот Зоран Заев, Лидерот на СИРИЗА и поранешен премиер на Грција, Алексис Ципрас,  министерот за надворешни работи Никола Димитров, поранешниот претседател на Европскиот парламент Мартин Шулц, поранешниот помошник државен секретар на САД Вес Мичел, и поранешниот премиер на Белгија Гај Ферхофштад. Минатата година Самитот на ЕУ и Западен Балкан се одржа во Белград, каде претседателот Арсовска учествуваше на панел сесија посветена на одржлив пат на регионот кон економски развој,  претходно во Подгорица, Виена, Букурешт и други европски центри.
Повеќе ...

ССК за прв пат во Македонија со дигитализација на сертификат за потекло за извоз

ССК за прв пат во Македонија со дигитализација на сертификат за потекло за извоз 27.09.2019

Сојузот на стопански комори на Мaкедонија (ССК) стартува со дигитални Сертификати за потекло за прв пат во нашата држава. Пред македонските компании и соработници, со поддршка на Проектот на УСАИД за развој на деловниот екосистем (БЕП), Сојузот го промовира процесот за електонско издавање на Сертификат за потекло, што за компаниите ќе значи заштеда на време, средства и подобрување на сигурноста за веродостојност на Сертификатот за потекло.  До сега Сертификатот за потекло кој претставува меѓународен трговски документ што се користи за да се одреди потеклото на стоките за службени, комерцијални и финансиски потреби при извоз,  се издаваше исклучиво во хартиена форма со пропратна документација. Претседателот на Сојузот, Данела Арсовска, во своето обраќање истакна дека  дигитализацијата на деловните процеси е во функција на  подобрување на услугите кои ги нуди Сојузот за компаниите во функција на зголемување на продуктивноста и конкурентноста на деловната заедница. „Во светски рамки, стопанските комори имаат централна улога во олеснувањето на глобалната трговија, што е значајна заложба на Сојузот на стопански комори. Дел од услугите се и издавање сертификати за потекло за извозниците. Водејќи се од глобалните трендови, Сојузот  од денес, стартува со новата услуга за компаниите што ќе значи  полесно, поефикасно и побрзо дигитално издавање на Сертификати за потекло за  производите наменети за извоз. Досегашниот процес на хартиено издавање на Сертификатот одземаше драгоценo време,  поточно подигнување на документација, пополнување од страна на компаниите и повторно доставување за верификација.  Сегашната процедура ќе се одвива електронски во целина, со што се скратува значително од времето за администрирање на сертификатите, се заштедува не само време, туку и трошоци за пaтување од и до местото на издавање, а дополнително се зголемува транспарентноста на севкупниот процес“, истакна Арсовска и додаде дека електронскиот Сертификат за потекло  е средство за олеснување на трговско опкружување и е неопходен при извоз на македонските извозни компании. Во нашата земја првата компанија која започна да го користи електронскиот сертификат за потекло е ТИФИ ГРУП, увоз-извоз од Велес.  На официјалната промоција, директорот Филип Рашевски, истакна дека на овој начин процесите се забрзуваат и над 90 проценти, се заштедува време и средства за патување, поточно процедурата хартиено ја завршувале минимум за еден ден вклучувајќи го и патувањето, а сега електорнски се завршува за кратко.„ Модернизирање на процедурите за извоз, навистина заштедуваат време и средства“, исткна Рашевски. Сертификатот за потекло на реномираната светска компанија ESS CERT која управува со најголемата електронска мрежа на сертификати за потекло во светот, опфаќа 240 стопански комори, го користат 14 земји од целиот светот во Европа, Америка, Африка, Азија и Океанија. Кон Европските, Ирска, Холандија, Норвешка, Словенија, Шведска и Обединето кралство од денес се приклучува и Македонија. Сертификатот за потекло се користи во меѓународните трговски трансакции со кој се потврдува дека производот наведен во него исполнува одредени критериуми за потекло од одредена земја. Истиот, се доставува до царинскиот орган на земјата увозник за да се оправда подобноста на производот за влез. Златко Ветеровски, помошник директор на Сектор за царински систем, Царинската Управа истакна дека спроведување на дигиталните процеси не се едноставни, но придобивките несомнено се големи, бидејќи ја подобруваат конкурентноста како на компаниите, така и на самите институции во насока на создавање поефикасна околина во согласност со глобалниот развој.  Во светот околу две илјади стопански комори доставуваат повеќе од 12 милиони сертификати за потекло годишно. Во 1898 година бил издаден првиот сертификат за потекло, а по потпишувањето на 1923 Женевската конвенција, коморите се признати од страна на владите и царините како надлежни органи за издавање на сертификати за потекло. Коморите играат значајна, важна улога како доверливи трети страни, кои носат сигурност, интегритет, неутралност и непристрасност во издавањето сертификати за потекло.
Повеќе ...